la corse

Soli di focu à Cilenti ,
Infiaratu hè lu Punenti
Sulioni è sciappittana
Pichja in ogni catagnu.

Vaghjimu apri la porta
La divizia in la sporta
Fà ch’hè ghjuntu San Martinu
Si rallegra lu mulinu.

Ripigliu

Staghjoni passa ,Staghjoni volta
U tempu sparghji U tempu rodi
Ghjornu avviccina Ghjornu alluntana
Cori si strigni Cori si spanna

Limpa , saetti è tonu ,
Trema tuttu lu rughjonu ,
Fretu, tempu spavintosu
Ugnunu cerca l’ascosu.

Incù lu soli abbracciata ,
Bedda com’è una spusata,
Si pesa l’alba di Branu
Discetta lu mondu sanu.

S’ANU CUMPRATU U SOLE
È SFRUTTATU TANTE TARRE
CI CONTANU E SO FOLE
PER LAMPACCI TUTT’IN MARE
L’ASSASSINI

SÒ CURBACCI CUMACHJATI
À VENDESI L’ARIA FINE
È MORENU CUNSUMATI
À L’ACQUISTU D’UN CINQUINU L’ASSASSINI

CI ANU PIGLIATU À TUTT’IN MANU
PO CI ANU STRETTI IN FARRI
CUM’ELLI SÒ POCHI UMANI
CI TECHJANU DI FILARI L’ASSASSINI

CI ANU BETU TANTU SANGUE
È TAGLIATU TANTE STRADE
CHÌ CI PORTANU E STANGHE
DI L’INTERRU GENERALE L’ASSASSINI

SI SÒ PIGLI DI CUNCERTU
MORERANU DI SPERANZA
CHÌ DI FANNE UN DESERTU
MAI ÙN SERETE ABBASTANZA L’ASSASSINI

Umaghju a Marcu Ceccarelli

Muntagna, muntagna cara eternu amori
Muntagna corsa fiera è sminticata
Fideli è muta tali una spusata
Ricca di storia è ricca di culori…
Par mè sarè sempri a me muntagna
Dundi a nivi hà tessu a curona
Imbalsamata da l’arba barona
Indù si cala è si spechja l’altagna !
Hà datu sempri aiutu à u rimitu
Persu da la disgrazia o la svintura
In a furesta zippa è sicura
Hà piattu u guerrieri è u banditu...
Muntagna corsa ascolta la me pena
Vàrdati da la piaghja traditora
Chì pianu pianu andarà à mora
Aval’ chì calcicata hè la so rena !
È i to ochji pieni di tristezza
Ùn poni chè vidè ‘ssu mondu vanu
Ùn datti più aiutu di so mani
È culmà u to cori d’amarezza
Ma un ghjornu vinarà chì a notti pagna
Si spannarà par dà piazza à u soli
Cantarani dinò i paisoli
È tù rinasciarè a me muntagna…
Un ghjornu vinarà indù l’omu ingratu
Dumandarà pardonu cù rimorsu
È tù muntagna mamma di u Corsu
L’assolvarè malgradu u so piccatu !!!